پاکستان میں یوٹیوب پر کونٹینٹ کری ایشن یا مواد کی تیاری کی رفتار تیزی سے بڑھ رہی ہے اور ملک کے ڈیجٹیل منظرنامے پر تخلیق کاروں، فنکاروں اور سٹوری ٹیلرز کا ایک متحرک نظام موجود ہے۔

جیسے ہی ہم سال 2026 میں داخل ہو رہے ہیں پاکستانی تخلیقی صلاحیتیں صرف ملک کے اندر ہی پروان نہیں چڑھ رہیں بلکہ دنیا بھر کے ناظرین کی توجہ حاصل کر رہی ہیں۔ 

سنہ 2025 میں 95 ہزار سے زائد پاکستانی یوٹیوب چینلز نے 10 ہزار سبسکرائبرز کا سنگِ میل عبور کیا ہے جبکہ 13 ہزار سے زیادہ چینل ایسے تھے جن کے ناظرین کی تعداد ایک لاکھ سبسکرائبرز سے تجاوز کر گئی۔

اسی طرح سے ایک ہزار سے زیادہ پاکستانی چینلوں نے 10 لاکھ سبسکرائبرز کا بڑا ہدف بھی عبور کیا جو عالمی سطح پر پاکستانی کونٹینٹ کی مقبولیت کا واضح ثبوت ہے۔

سب سے زیادہ متاثر کن پہلو پاکستان کی بڑھتی ہوئی عالمی رسائی ہے جہاں پاکستانی مواد کے مجموعی واچ ٹائم کا 60 فیصد سے زائد حصہ بیرونِ ملک ناظرین پر مشتمل ہے۔

کراچی سے کوالالمپور، لاہور سے لندن تک، پاکستانی تخلیق کار ثقافت، تفریح اور مشترکہ انسانی تجربات کے ایسے پُل قائم کر رہے ہیں جو سرحدوں سے ماورا ہیں۔

گوگل کے ریجنل ڈائریکٹر برائے بزنس و آپریشنز فرحان قریشی کا کہنا ہے کہ ’پاکستانی تخلیق کاروں کی طرف سے جو کچھ ہم دیکھ رہے ہیں وہ صرف مقامی ناظرین کے لیے مواد تیار کرنے تک محدود نہیں بلکہ وہ ایسی کہانیاں، نقطۂ ہائے نظر اور تفریحی مواد تخلیق کر رہے ہیں جو براعظموں کے پار لوگوں کے دلوں کو چھو رہا ہے اور اس چیز کی ازسرِنو تعریف متعین کر رہا ہے کہ عالمی سطح کا تخلیق کار ہونے کا مطلب کیا ہے۔‘

وہ بتاتے ہیں کہ ’اس کا اثر صرف ویوز اور سبسکرائبرز تک محدود نہیں بلکہ یہ تخلیق کار پائیدار کاروبار قائم کر رہے ہیں، روزگار کے مواقع پیدا کر رہے ہیں اور پاکستان کی ڈیجیٹل معیشت میں بامعنی کردار ادا کر رہے ہیں۔ یہ ایسی تخلیقی صلاحیت ہے جو ثقافتی اور معاشی دونوں حوالوں سے حقیقی ثمرات فراہم کر رہی ہے۔‘

پاکستان سے پیش کیا جانے والا متنوع مواد ملک کی شاندار ثقافتی بُنت کی عکاسی کرتا ہے۔ تخلیق کار سنسنی خیز ڈراموں اور کھانے پکانے کی مہم جوئی سے لے کر پوڈکاسٹس، فیشن، لائف سٹائل ویڈیوز، ایجوکیشنل مواد، دستاویزی فلموں اور ٹیکنالوجی کے جائزوں تک سب کچھ تخلیق کر رہے ہیں۔

کنیکٹڈ ٹی وی (Connected TV) کے ناظرین کی بڑھتی ہوئی تعداد کے ساتھ معروف تخلیق کار اب طویل، اعلیٰ معیار کی پروڈکشن پر مبنی سلسلہ وار مواد تخلیق کر رہے ہیں جو روایتی ٹیلی وژن کا مقابلہ کرتا ہے۔

پاکستانی یوٹیوب کمیونٹی کی رفتار مسلسل بڑھ رہی ہے۔ روزانہ نئے چینل متعارف ہو رہے ہیں اور معروف تخلیق کار تخلیقی حدود کو آگے بڑھا رہے ہیں۔ پاکستانی مواد یہ ثابت کر رہا ہے کہ بہترین کہانی سنانے کی کوئی سرحد نہیں ہوتی اور یہ کہ حقیقی آوازیں دنیا کے کسی بھی کونے میں اپنا ناظرین تلاش کر سکتی ہیں۔